Об использовании тропарей святым за богослужением

14.09.2017 16:48

По благословению епископа Флавиана распоряжением № 29 от 13 сентября использовать тропари за богослужением.

 

Преподобному Зосиме Ворбозомскому

Тропарь, 2 глас

Явился еси в земле Белозерской яко звезда пресветлая,/ Христовою любовию уязвился еси преподобне,/ на остров пустынный езера Ворбозомского вселився,/ в молитвах, трудех и пощениях пожив,/дерзновение пред Господем снискал еси./ Преславне отче наш Зосимо,/ моли Всемилостиваго Бога/ оставление согрешений нам даровати// и спастися душам нашим.

Кондак, 6 глас

Яже в мире тленная оставив,/ преподобне отче наш Зосимо,/ пустыннаго жития поприще прошед,/ жизнь нетленную улучил еси./ С лики ангельскими ныне предстоиши Господу./ Не забуди чад твоих, святе,/ соблюдая нас молитвами твоими/ от враг видимых и невидимых,/ покрывая любовию всех с верою призывающих тя// и чтущих пресветлую память твою.

Молитва преподобному Зосиме Ворбозомскому

О священная главо, преподобне отче наш Зосимо, утешитель и скорый услышатель молитв наших! Се мы, недостойнии и многогрешнии, с благоговейною любовию к тебе, святе отче, прибегаем и духом сокрушенным и смиренным прилежно молим тя: призри милостиво на нас, убогих и недостойно жительствующих, и своим благомощным ходатайством к Богу испроси душам нашим грехов оставление, жития исправление, вседейственное вразумление и коемуждо потребное для жизни временней и вечней.

Сохрани стадо твое, святе, молитвами твоими от всякия сопротивныя силы, напасти и от всякаго злаго обстояния. В любви, единомыслии и сокрушении о гресех наших соблюди нас, отче. Да благодарение возслем Всемилостивому Богу за бесчисленные благодеяния Его на нас щедро изливаемые.

Наипаче же моли Премилосердаго Бога, да избавит всех нас от внезапныя смерти, и всем нам христианскую кончину живота и добрый ответ на Страшнем Судищи дарует.

О, Белозерския земли славо и украшение, угодниче Божий Зосимо! Ходатайствуй у Великого Заступника душ и телес наших, да утвердит Святую Церковь и Отечество наше в мире, духе правыя веры и любве, ныне и присно и во веки веков. Аминь.

 

Тропарь  преподобному  Гурию  Шалочскому, глас 1

Стопам Христовым последуя,/богомудре Гурие,/в пустыню  близ Шалочь-реки вселился еси/и обитель Успения Пречистыя Богородицы сотворил еси./В ней же святе непреклонно противу козней невидимых враг подвизался еси,/мечом непрестанныя молитвы полки страстей побеждая,/в заповедех Господних беспорочне ходя,/ тем же венца славы Небесной сподобился еси./Сего ради дерзновение имея,/преподобне отче Гурие,/испроси нам у всемилостивого Бога/благочестное житие и спасение душам нашим.

Кондак, глас 6

Волнения моря житейского и суету мирскую во уметы вменив,/земный ангеле, пустынный жителю, богоблаженне Гурие,/бесплотные враги и страсти плотския слезными молитвами потопив,/явился еси жилище Пресвятыя Троицы./ Монахом наставник и  многим людем утешитель быв,/святе, и ныне путевождь своему стаду ко спасению буди,/ утоляй скорби сердец наших/ и молися непрестанно о всем мире, преподобне.

Тропарь преподобному Филарету Устюженскому

глас 8

Ревнитель пустынного жития,/ преподобне отче Филарете,/ Евфросину боголюбивому сомолитвенник быв/ и Гурию богомудрому собеседник./ В места непроходимые вселился еси./ Плод добрый Господеви принесл еси./ Моли о нас, Звездо пресветлая Церкви Христовы,/ да не тернием страстей оплетенным нам быти,/ но житие наше проводити в угождении Богови./ Пособствуй, всеблаженне, спастися всем,// с любовию чтущим память твою.

Кондак  преподобному Филарету Устюженскому

глас 1

Христовою любовию уязвился еси/ преподобне отче Филарете./ В пустыню вседушно устремился еси/ к познанию Божественному./ Венца небесного сподобился еси,/ и ныне, предстоя Престолу Пресвятыя Троицы,/ моли, доброхвальне,// умирити мир и спасти души наша.

 

Тропарь  преподобному Даниилу Шужгорскому

Глас 5

Горлице пустыннолюбная,/ преподобне и богоносне отче Данииле,/ на горе любовию водворяяйся,/ вся долу влекущая оставил еси/ и труды ко трудом прилагая,/ на боговедения гору неисходно возшел еси./ Помощник буди, преподобне, всем, любовию чтущим тя,/  да шествие свое в Горняя совершим// и причастницы Жизни Вечныя будем.

Кондак преподобному Даниилу Шужгорскому

Глас 1

Образе веры и смирения,/ преподобне отче наш Данииле./ Любве Божественныя исполнен быв,/ трудный подвиг пустынного жития избрав/ и в добродетелях возрастая,/ людям страждущим помощник обрелся еси верен./ Тем тя молим, не остави нас,// отче милостивый.

 

Тропарь преподобному Моисею Белозерскому

глас 2

Светильник края Белозерскаго,/преподобне отче Моисее,/ озарил еси люди светом любве Христовой,/ от обители земной восшел еси ко Престолу Пресвятыя Троицы./Служа Богу трудами своими и молитвами,/дара прозрения снискал еси,/да люди Божия упасеши./Тако и ныне, мудре Моисее,/ведый умы и сердца наша,//приведи нас в Царствие Небесное.

Кондак преподобному Моисею Белозерскому

глас 1

Преподобне отче, Христа ради/труды постническия подъемля,/змия древнего попрал еси./Непрестанными молитвами и добродетельным житием/премудре, Бога достигл еси./Тако, отче Моисее,/путевождь буди нам//к Небесному Иерусалиму.

 

Преподобного Сергия Шухтомского месяца мая в 19-й день

 

Тропарь, глас 8:

Бде́нными  моли́твами  и  пото́ки сле́з­ными пусты́ню напои́л еси́ / и  из    глубины́ воздыха́ньми ю расплоди́л еси́ /и бысть по́стнически ра́вно А́нгелом житие́ твое́; /страда́льчески боре́ньми, я́же от бесо́в и от ненака́занных челове́к, претерпе́л еси́ /и А́нгелом собесе́дник яви́ся, /Боже́ственнаго виногра́да насе́ятель быв; /и, оста́вив вре́менное житие́, пресели́лся еси́ в жили́ще Небе́сное. /Те́мже тя почита́ем, преподо́бне о́тче наш Се́ргие, //моли́ Христа́ Бо́га спасти́ся душа́м на́шим.

Кондак, глас 2:

От ми́ра скры́вся, в пусты́ни пожи́л еси́, / досточу́дне Се́ргие, / но   Христо́с тя показа́ Ру́сской земли́, / я́ко сокро́вище многоце́нное. / Пусты́ню одожди́л еси́ свои́ми по́ты / и бысть, я́ко ри́за виногра́да нетле́ннаго, / те́мже моли́ за архиере́и и за вла́сти, // и за вся христиа́ны, чту́щих па́мять твою́.

 Молитва

 О многотерпели́ве подви́жниче, преподо́бне Се́ргие, о́тче наш! Ты  от   лет млады́х и́го Госпо́дне на ра́менах свои́х понести́ восхоте́вый, устреми́л еси́ стопы́ твоя́ ходи́ти в за́поведех Его́ и ру́це твоя́ укрепи́л еси́ к де́ланию повеле́ний Его́. Ты, о́тче преподо́бне, ве́рою несумне́нною укрепля́емь, от стран ю́жных, иде́же Госпо́дь наш Иису́с Христо́с пло́тию Свое́ю пречи́стою хожда́ше, и ра́спят бысть, и воскре́се из ме́ртвых я́ко Бог, да́же до стран полу́нощных, я́же близ окия́на ледови́таго, востече́, сло́во Бо́жие возвеща́я и в по́двизех свои́х возраста́я в ме́ру соверше́нну. Ны́не мы гре́шныя, ча́да твоя́, собра́ннии на ме́сте земна́го твоего́ упокое́ния, иде́же положе́но бысть многотру́дное те́ло твое́, вопие́м к тебе́ из глубины́ се́рдца и глаго́лем: огради́ святы́ми твои́ми моли́твами зе́млю на́шу и вся лю́ди, ча́ющия твоего́ ми́лостиваго предста́тельства, градо́м и ве́сем бу́ди тве́рдый храни́тель, па́стырем бу́ди о́браз ве́ры и наставле́ние во благоче́стии, и́ноком в терпе́нии и целому́дрии путево́ждь. Умири́, о святы́й наш наста́вниче,  вся раздо́ры, в наро́де на́шем а́ки бу́ря воздвиза́емыя, да прии́дем во еди́нство ве́ры и в сою́з любве́, во е́же испо́лнитися на нас словесе́м Госпо́дним: а́ще в любве́ пребу́дете, позна́ет мир, я́ко пои́стине ученицы́ Моя́ вы есте́. Не отри́ни нас от покро́ва  моли́твы твоея́, те́плый наш ко Го́споду хода́таю, да не бу́дем сне́дию врагу́ и бра́шном  чужде́му, но да бу́дем до после́дняго на́шего издыха́ния подража́телями тебе́ в соблюде́нии за́поведей Госпо́дних, сла́дость вкуша́юще  повеле́ний  Его́. И я́ко же благовествова́л  еси́ Зако́н Госпо́день, прохожда́я зе́млю всю, даждь и нам от восто́к со́лнца и до за́пад хвали́ти И́мя Госпо́дне, да твои́м заступле́нием дости́гшее бесконе́чнаго невече́рняго дне, ку́пно с тобо́ю вни́дем  в Го́рний све́тлый Иерусали́м, иде́же Безнача́льному Небе́сному Отцу́, от небытия́ в бытие́ нас приве́дшему, и Беспоро́чному А́гнцу Бо́жию, Кро́вию Свое́ю нас искупи́вшему, и Животворя́щему Уте́шителю Ду́ху, да́ры благода́тными нас снабдева́ющему, песнь воспои́м во ве́ки веко́в. Аминь.

 

103 просмотров
Русская Духовная Миссия в Иерусалиме Архиерейское подворье Кафедральный собор храм Рождества Христова